فى بيتنا جنى (ادخل ومش هتندم )

بدأت الحكاية الاسبوع اللي فات زي دلوقتي...هو صحيح كان يوم اتنين واحنا انهاردة الجمعة...وصحيح برضو ان دلوقتي الساعة 9 الصبح وساعتها كانت الساعة 3 الفجر بس مش مهم كل الافلام بتبدأ كدة

أنا صاحي من النوم عشان اشرب عادي جدا...هوب لقيت الكباية بتطير يا معلم...افتكرت نفسي بحلم وقلت دلوقتي اصحي

وعدت الايام والسنين...وبعد الحادثة دي بساعتين بالظبط صحيت من النوم علي صوت صلاة الفجر...لقيت امي جاية تصحيني عشان أصلي الفجر كالعادة برضو...انا قمت اتوضيت وصليت...واول ما خلصت صلاة افتكرت الحقيقة المرة

ايوة امي ميتة من 25 سنة اساسا...صرخت صرخة جابت اخر الشارع...بس محدش من اهل البيت صحي عشان انا عايش لوحدي اساسا

قلت ان دي اكيد احلام عادي يعني...بعدين امي جاتلي في المنام كذا مرة محصلش حاجة

بعد ما خلصت صلاة الفجر رحت استعد عشان انزل الشغل

طلعت من اوضة النوم...لقيته مستنيني برة عالانتريه

قالي:صباح الخير

قلتلته:صباح النور يا سيد...هو حضرتك مين

قالي:ابدا انا عفريت عادي

قلتلته:اه لو كدة ماشي...وبتشرب ايه يا عم عفريت انت

قالي:يا ريت كباية مية نار

قلتله:اه مية نار...حضرتك قلتلي ايه...عفريت...ااااااااااااااااااااااااااااااااااااااااااااااااااااااااااااااااااااااااااااااااا؊?ااااااااااااااااااااااااااااااااااااااااااااه

وطلعت اجري بأقصي سرعة ممكن تجاه الباب...فتحته خرجت رحت عالشغل علما اني كنت لسة لابس شبشب الحمام ابو صباع

وصلت الشغل...تقريبا محدش مخدش باله من الشبشب...وخصوصا اني لابسه عالبدلة يعني

دخلت المكتب لقيت نفس الشخص مستنيني

قلتله:ايه يا عم انت مين

قالي:ما قلتلك عفريت يا سيد عاوز ايه تاني

قلتله:اه عفريت لا صح انت قلتلي قبل كدة...وحتي بالامارة ساعتها انا قلت اااااااااااااااااااااااااااااااااااااااااااااااااااااااااااااااااااااااااااااااااااااااااااا؊?ااااااااااااااااه

واتلموا عليا الموظفين...واكيد لسان حالهم بيقول مين المجنون ابن الـ.... ده

واحد منهم قالي:ايه يا عمنا خير

- لا ابدا كان في عفريت هنا

وتعالت الضحكات...وكاني بقول نكتة

وطبعا حاولت افهمهم بس من غير فايدة

طلعت من الشركة خالص وروحت بيتنا...ملقتش حد الحمد لله

ولحد الوقت اللي انا بحكيلكم فيه القصة دي وانا مش عارف العفريت ده عاوز مني ايه...معلش ثواني حفتح الباب واجي اكمل الحكاية

- ايوة مين حضرتك

- انا العفريت...ومن غير صويت

- انا العفريت ومن غير صويت!!...وقت سجع اصله...ايه انجز

- انا كنت جايلك اسأل علي حاجة عندك

- معنديش يا عم انا معطيتش لحد حاجة

- الله هو انت مش احمد عبد الغني

- لا يا عم انا اسمي محمد حمدى

- اه معلش توارد خواطر بقي

- اي خدمة تاني حضرتك؟

- لا يا عم خلاص...بقي انا بقالي اسبوعين بجري وراك ومتطلعش انت اللي عاوزه في الاخر

وقفل الباب وجري!!!